Chaidh an làrach-lìn a chur air bhog le Pixmen ùr-ghnàthach tro phasgain air an ceangal ri sgàilean còmhnard os cionn dhaoine, agus mar sin a’ toirt cothrom dhan luchd-tadhail coimhead air an làraich agus bruidhinn ri luchd-obrach a’ Bhùird ma deidhinn.    

Thuirt Rosemary Nic a’ Bhàird, Àrd-Oifigear Bhòrd na Gàidhlig san eadar-ama:

“Is e foghlam Gàidhlig aon de na roinnean an taobh a-staigh foghlam ann an Alba, air as luaithe a thàinig leasachadh o chionn còrr agus 23 bliadhna, agus tha e na phrìomh chuimse anns an obair aig Bòrd na Gàidhlig.

“Mar thoradh air an leudachadh seo, tha iarrtas ann a tha a’ sìor fhàs airson luchd-teagaisg na Gàidhlig air feadh Alba le cothroman rim faotainn anns gach ìre de theagasg.

“Tha miann làidir againn mothachadh dhaoine a thogail a thaobh nan cothroman sin agus tàlant ùr a mhisneachadh gu dreuchd ann an teagasg. Tha ùidh ann an Gàidhlig a’ fàs agus tha ruigsinneachd air ionnsachadh a’ chànain a’ meudachadh, an dà chuid san t-suidheachadh fhoirmeil sgoile agus ann an raon ionnsachaidh nan inbheach. Tha am Bòrd air grunn phròiseactan brosnachail a chur air bhonn gus tuilleadh leudachaidh air a’ chànan a chumail a’ dol. Chan eil àm nas fheàrr air a bhith ann airson do sgilean a chleachdadh gus Gàidhlig a theagasg dhan ath ghinealach. Gabh an Cothrom agus thig a theagasg!”

Thuirt Linda Fabiani, Ministear a’ Chultair: “Tha prìomh amas aig Riaghaltas na h-Alba àite na Gàidhlig a mheudachadh an taobh a-staigh roinn an fhoghlaim againn, gus dèanamh cinnteach gum bi an cànan seasmhach san àm ri teachd.

“Tha an goireas ùr barrail seo a’ cuideachadh leis an amas sin a choileanadh le bhith a’ togail air cothroman agus a’ brosnachadh raon fharsaing de dhaoine gu teagasg ann an sgoiltean agus ann an sgoiltean-àraich air fad na dùthcha.’’

Am measg nan cothroman teagaisg a tha rim faotainn tha:

• luchd-teagaisg tro mheadhan na Gàidhlig ann an sgoiltean-àraich agus ann am bun-sgoiltean  
• luchd-teagaisg airson Gàidhlig a theagasg mar dhàrna cànain sna bun-sgoiltean (GLPS)
• luchd-teagaisg tro mheadhan na Gàidhlig ann an àrd-sgoiltean gus raon de chuspairean a theagasg mar: Cruinn-eòlas, Nuadh Rannsachaidhean, Eachdraidh, Matamataig, Banas Taighe agus Saidheans
• luchd-teagaisg airson Gàidhlig a theagasg sna h-àrd-sgoiltean dha fileantaich agus dha sgoilearan a chaidh tro fhoghlam tro mheadhan na Gàidhlig 
• luchd-teagaisg airson Gàidhlig a theagasg sna h-àrd-sgoiltean dha luchd-ionnsachaidh