Aithisg Bhliadhnail

Bòrd na Gàidhlig Aithisg Bhliadhnail 2007/08

Toirt Fàs air Gàidhlig ann an Coimhearsnachdan

Dihaoine 12 Sultain 2008
Ionad Coimhearsnachd Bhreascleit, Eilean Leòdhais

A’ Cho-labhairt:

Beachdachaidh a’ cho-labhairt air na thathas a’ ciallachadh leis an teirm coimhearsnachd na Gàidhlig ann an co-theacs Alba an latha-an-diugh; dè na gnìomhan a tha a dhìth gus ath-bheothachadh a thoirt air a’ Ghàidhlig anns na sgìrean thraidiseanta far an robh i làidir agus dè an taic a tha a dhìth airson leasachaidhean cànain anns na coimhearsnachdan Gàidhlig.

Bheir a’ cho-labhairt sùil gheur air an òigridh a tha a’ cleachdadh na Gàidhlig gu cunbhalach; dè a tha gam brosnachadh agus dè na dòighean as fheàrr gnothaich a dhèanamh ris an òigridh gus ro-innleachdan ath-bheothachaidh a chur air dòigh dhan Ghàidhlig.

Builean ris a bheil dùil:

• tuigse shoilleir fhaighinn air dè na ceumannan bu chòir a ghabhail gus a’ Ghàidhlig a neartachadh anns na coimhearsnachdan
• dè na prìomh amasan a bhiodh an cois iomairt cànain coimhearsnachd
• na ceumannan a dh’fhaodas ùghdarrasan ionadail agus buidhnean poblach a ghabhail
• an dleastanas a dh’fhaodadh a bhith air Fòram Òigridh agus Ro-innleachd Òigridh ann an leasachadh cànain
• mar a dh’fhaodadh Stòras Dùbhlain bho Bhòrd na Gàidhlig a bhith air a chleachdadh gus taic a thoirt do dh’iomairtean beaga Gàidhlig anns na coimhearsnachdan

Cruth na Co-labhairt:

Bidh a’ cho-labhairt a’ leantainn structair cafaidh far am bi 8-10 riochdairean nan suidhe aig gach bòrd.  Bidh còmhraidhean air an stiùireadh fo sgiath luchd-stiùiridh ainmichte, a bhios a’ leantainn brath-ullachaidh a chaidh a dhèanamh ro-làimh, agus ceistean ro-sgrìobhte.  Nì gach buidheann cinnteach gun tèid na freagairtean aca a chlàradh agus gun tèid an toirt dha Rùnaire na Co-labhairt.

Bidh buidheann de 10-16 anns na clasaichean àrd-sgoile as sine an làthair airson seisean an fheasgair.  Thathas an dùil gum bi na sgoilearan a’ tighinn bho Sgoil MhicNeacail (Steòrnabhagh), Sir E Scott (Na Hearadh), Sgoil Lionacleit (Uibhist), Àrd-sgoil Bhàgh a’ Chaisteil (Barraigh) agus Àrd-sgoil Phort Rìgh (An t-Eilean Sgitheanach), ma bhios e comasach.  Bidh CNAG a’ dèiligeadh ri còmhdhail agus stiùireadh nan sgoilearan. 

Cànan na Co-labhairt:

’S ann tron Ghàidhlig a bhios a’ cho-labhairt ach bidh seirbheis eadar-theangachaidh ri faighinn far am bi sin a dhìth.

Airson tuilleadh fiosrachaidh cuiribh fios gu:

Dolina NicLeòid, Sgioba na Gàidhlig, Comhairle nan Eilean Siar air 01851 703773.